Gin-aprubahan na kahapon sang Sangguniang Panlungsod sang ciudad sang Bacolod ang pagtukod sang carnival sa Bacolod City Government Center Football Field.
Sa interview sang Bombo Radyo Bacolod kay Bacolod City Councilor Al Victor Espino, ang chairperson sang Committee on Laws and Ordinances sa City Council, maga-umpisa ang operation sang carnival para sa publiko sa Oktobre 1 kag magalawig tubtob sa Oktobre 30.
Nahibaluan nga nagtuga sang issue ang pagset-up sang Bacolod Yuhom Foundation sang carnival matapos matukiban nga ini ang wala pa sang pahanugot gikan sa Sangguniang Panlungsod.
Kahapon sa ginpatigayon nga Committee Conference, ginprubahan sang Sangguniang Panlungsod ang letter gikan kay Bacolod Yuhom Foundation President Katherine Matiling.
Sila ang ginhatagan man sang kahigayunan nga makapaathag kun ngaa temprano pa ang mga ini nagset-up kag nakita nga ginapagana na sang operator ang mga rides apisar nga wala pa sang approval.
Suno kay Espino, gin-athag sang Bacolod Yuhom Foundation nga sila ang wala na naghulat pa sang SP resolution bangod malawig ang oras nga kinahanglan para sa pagset up sang equipments, gani ini ang dapat matapos antes paman ang Oktobre.
Dugang pa sang mga ini nga magluwas sa pagset-up sang equipments, kinahanglan man nila ini nga I-evaluate agud maseguro nga safe ang mga rides para sa publiko.
Matapos ang pagpahanugot, ginpahayag ni Espino nga sarang na nga maka-operar ang carnival, apang ang Bacolod Yuhom Foundation na mismo ang naglatag sang petsa nga sila ang maga-umpisa sa pagcater sang publiko sa Oktobre 1.
Apang pahanumdom gihapon ni Espino nga kinahanglan ang approval sang City Government antes makagamit sang propedad kaangay sa Football Field sang Bacolod City Government Center.
Suno sa konsehal, ini na ang ikaduha nga beses nga nag-install sang carnival ang Bacolod Yuhom Foundation nga wala sang permit gikan sa Sangguniang Panlungsod gani pahanumdom sini nga indi na dapat maliwat ang kaangay nga hitabo.
