Ginpadal-an na sang sulat sang Sangguniang Bayan sang La Castellana si Councilor Donato “Natnat” Dumaguit bangod sa tayuyon sini nga pag-absent sa Council Meeting.
Sa interview sang Bombo Radyo Bacolod kay Councilor Leonardo Bacquian, chairman sang Committee on Rules sa La Castellana, gin-athag sini nga lima na ka SB session ang wala natambungan ni Councilor Dumaguit.
Ini ang ginalakipan sang apat ka regular session nga ginapatigayon kada Miyerkules kag isa ka special session.
Suno kay Bacquian, sumugod sang nag-ibwal ang issue natuhoy sa involvement sang konsehal sa PNP recruitment scam, siya ang wala na nakapakita sa session sang Sangguniang Bayan.
Paathag naman sini nga wala nila ginpabulagbulagan ang concern, bangod duha pa lamang ka session nga wala nakatambong si Dumaguit ini ang ginpadal-an na nila sang letter pinaagi sa Municipal Council Secretary.
Sa sulat ginpahanumdom nila sa konsehal nga siya ang may duha na ka absent kag pananglitan siya ang magpadayun sa indi pagtambong sa session mahimo na makapanaog sang sanction ang Sangguniang Bayan.
Apang matapos nga wala sang may nakabatun sa letter, kag “by all means” ang mandato sa SB Secretary nga mapadangat kay Dumaguit ang memo, ini ang ginpicturan na lamang kag ginpadala sa iya via messenger.
Didto na kag nabasahan sang konsehal, apang ini ang nanindugan nga siya ang indi magtambong sa SB Session bangod sa kahangawa para sa iya kabuhi.
Panindugan ni Bacquian nga sila ang wala nagapasilabot angot sa issue sini sa PNP recruitment scam, apang bilang chairman sa Committee on Rules sang Sangguniang Bayan, kinahanglan sini nga ipahanumdom sa konsehal ang iya responsibilidad sa banwa.
Bangod sa konsiderasyon sa sirkumstansya nga gina-atubang ni Dumaguit, kahapon sila ang nagdesisyon nga liwat magpadala sang letter “by all means” nga nagapahibalo nga ang konsehal ang may-ara na apat ka un-excused absences sa regular session kag isa sa special session. Samtang, nagpaandam ang chairman sa Committee on Rules sang banwa sang La Castellana nga mahimo mangatubang sang sanction si Sangguniang Bayan member Donato “Natnat” Dumaguit kun ini ang padayun nga mag-absent sa session sang Municipal Council.
Sa interview sang Bombo Radyo Bacolod kay La Castellana Councilor Leonardo Bacquian, ginconvert agud mangin Committee of the Whole ang Sangguniang Bayan agud nga diskusyunan ang padayun nga pag-absent ni Councilor Dumaguit sa mga session.
Bangod sa apat na nga absences sa regular session kag isa ka absent sa special session, nagdesisyon ang body nga liwat padal-an sang sulat ang konsehal nga nagapahanumdom sang iya kapaslawan kag sa mahimo mangin tikang sang Sangguniang Bayan.
Apang siya ang ginhatagan pa nila sang adisyunal nga duha ka semana ukon duha ka regular session agud magpakita ukon magcommunicate sa Municipal Council.
Pahanumdom ni Bacquian, nga maathag ang nakapagkit sa Internal Rules and Procedure sang Sangguniang Bayan kag sa Section 15 sang Republic Act 7160, nga ang isa ka SB member nga may sunod-sunod nga un-excused nga absences ang maghimo pasakaan sang sanction sang Sangguniang Bayan.
Santo sa layi, ang konsehal ang mahimo ireprimend ukon pangayuan sang paathag sa rasun kun ngaa indi magtambong sa session.
Samtang ang penalties naman sa idalum sang Internal Rules and Procedure sang Sangguniang Bayan ang ginalakipan man sang pagsukot sa rasun sang absences.
Apang sa tion nga indi gihapon magtambong matapos sini, ang konsehal ang mahimo patpatan sang “dereliction of duty” nga makatuga na sang huol sa collective operations sang Municipal Government.
Bangod kaupod man nila si Dumaguit, luyag nila nga ini ang maglabay sa due process of law, apang kun ini ang magapabilin nga magapakatiga, liwat magaconvene ang Committe of the Whole agud maghimo sang tikang.
Paathag ni Bacquian nga wala sang gahom ang Sangguniang Bayan sa pagpahalin kay Dumaguit bilang SB Member.
Samtang kun sila ang magrekomendar sang expulsion sang konsehal, ini ang magakinahanglan sang two-thirds sang boto sang tanan nga SB members.
Ang boto kadungan sa deklarasyon sang dereliction of duty, ang magaserbe nga basihan sang Department of Interior and Local Government (DILG) agud ini ang ipasaka sa korte ukon sa Ombudsman.
