Para sa secretary general sang United Negros Drivers and Operators Center (UNDOC), insakto ang paglantaw sang alkalde sang ciudad sang Bacolod sa posible iextend ang pagbyahe sang traditional jeepney sa ciudad tubtob sa madason nga tuig.
Sa interview sang Bombo Radyo Bacolod kay Diego Malacad, importante para sa ila nga bahin ang posible nga extension nagikan sa Disyembre 31, 2023 nga ini magalawig pa.
Apang suno kay Malacad kun sila sa traditional may problema, may yara man sang kabudlayan para sa mga Modernized Jeepney kun sa diin, aminado man sila nga indi nila masarangan ang gasto kag balayran sa maintenance kag operation.
Ini bangod indi lamang ang konduktor kag driver ang ginabayaran apang apat ukon lima ka tawo sa kada unit ang ginasweldohan.
Ini ang rason kun kaisa naga-extend pa sang byahe ang mga drayber kag halos ginapadasok ang mga pasahero nga magsakay.
Suno kay Malacad, dapat may pagsulondan sa pagregulate sa kapasidad kun pila lang ang pasahero nga mapasakay.
Nagapangayo man ini sang kasiguraduhan sa pagpatuman sang extension nga suno diri, wala sang probelma kun kinahanglan nila maggasto sang dako para marepair ang ila mga salakyan.
Samtang, aminado man ini nga bisan ang iya nga jeep ang madaan na kag nagabyahe na humalin pa sadtong 1980’s, amo nga willing gid ini nga pagwapohon ang iya salakyan kun sigurado ang extend sa deadline sang byahe sang traditional jeep sa dalan sang Bacolod.
