Apat ka mga police officers kag isa ka non-uniformed personnel nga assigned sa Bacolod City Police Office ang ginaimbestigaran sa karon bangud sa ginaalegar nga kaangtanan sang mga ini sa recruitment scam nga nagbiktima sa mga residente sang La Castellana nga luyag magsulod sa Philippine National Police kun sa diin P17 million nga kwarta ang nataban.
Ini ang natukiban kasunod sang parallel investigation nga ginpatigayon sang Negros Occidental Provincial Internal Affairs Service kasunod sang kaso nga ginpasaka sang mga biktima batok sa utok-utok sang scam nga si Mary Jun Delos Santos kag La Castellana Municipal Councilor Donato ‘Natnat’ Dumaguit.
Suno kay PIAS officer-in-charge Police Executive Master Sergeant Randy Bando, ang apat ka mga police officers ang lunsay may ranggo nga police senior master sergeant kag may yara sang assigned sa Bacolod Police Station 4 kag BCPO headquarters.
Suno kay Bando, mismo ang mga complainant ang nagtuad sang ngalan sang mga pulis kag sang NUP kag madugay naman ang mga natungdan sa serbisyo.
Sa karon, indi pa mahingadlan ang mga pulis bangud padayon pa ang imbestigasyon sang Investigation and Detective Management Unit sang BCPO.
Suno sa mga complainant, si SB Member Dumaguit ang may abyan nga si Delos Santos ukon Ma’am Dabing gani ang mga luyag magsulod sa PNP ang nagacontact sa konsehal nga amo ang nagacontact kay Delos Santos.
Ginpromisahan ang mga ini nga makasulod sila sa PNP basta magabayad sang P250,000 nga package deal.
Suno kay Bando, indi pa matumod sang PIAS kun sin-o gid ang mayor nga recruiter bangud padayon pa ang imbestigasyon, apang ginpahayag sang mga complainant nga si Dumaguit ang nagarecruit sa ila kag nagadaho sang kwarta agud nga ihatag kay Delos Santos.
Ginpahayag sang mga naimbestigaran sang PIAS nga nagaconduct ang apat ka pulis sang Squad Weekly Interactive Meeting nga kabahin sang programa sang PNP, kag sa tion sang meeting, nakilala nila si Delos Santos kag Dumaguit, kag ginpakilala sang konsehal ang mga recruits sa mga pulis.
Bangud sini, nagtubo ang trust and confidence sang mga recruits kay Delos Santos kag Dumaguit bangud mismo ang mga pulis ang nagpahayag nga kilala nila ang duha bilang maayo nga tawo.
