Nagalapta sa karun sa social media ang pagpaandam sang mga nabiktima sa recruitment scam, pagpangbaldog, kag nakuhaan sang kwarta ni Mary June Delos Santos alyas “Madam Bing”, “Bing”, kag “DaBing”.
Nagapanawagan ang mga biktima sa mga kaangay man nga na-intoan ni Madam Bing nga maggwa kag mag-upod sa pagdugang sang complaint batok sa iya.
Ila luyag nga matapna na ang pagpanunto ni Madam Bing sa mga tawo ilabi na sa mga biktima sini nga luyag kun tani magsulod sa serbisyo sang Philippine National Police nga ginkuhaan sini sang kwarta nga kapin sa P100,000 tubtob P300,000 sa rason nga siya madamo sang kakilala nga opsiyal.
Suno sa mga biktima mahilig magpadikit sa Bacolod City Police Office si Madam Bing kag amo nga nagapa-picture ini kaupod sa ila kun sa diin ginagamit sini ang picture bilang pag-ingganyo sa mga tawo nga iya ginapasaligan nga buligan nga makasulod sa PNP.
Apang, indi lamang ang mga aplikante sang PNP ang iya gina-into, nalakip na diri ang mga negosyante, naga-apply abroad, naga-apply bilang seaman kag mga ordianryo nga tawo nga matsansahan sini nga ma-utangan.
Gina-utangan kag ginapalagyohan man sini ang iya ginapang-rentahan nga balay.
Suno sa mga biktima, tumandok ini sa banwa sang La Castellana kag ini may balay sa San Dionisio, Barangay Granada, ciudad sang Bacolod.
Samtang, nakig-angot ang isa sa mga biktima ni Madam Bing sa Bombo Radyo agud ipahayag ang ginhimo nga pagpang-into nga ginhimo sa iya.
Suno kay Zin nga isa ka zumba instructor, nakilala sini si Madam Bing bangod siya gintanyagan nga magpatigayon sang isa ka Zumba activity sa Bacolod City Police Office.
Suno diri, nagpakilala si Madam Bing sa iya nga ini may maayo nga koneksyon sa BCPO.
Apang, natapos lamang ang aktibidades kag wala sini nabayaran si Zin sang talent fee.
Dugang pa bangod nga naga-negosyo si Zin, iya man ginsaligan si Madam Bing kun sa diin P15,000 ang nakuha sa iya.
Nabiktima man ang abyan ni Zin nga gin-utangan ni Madam Bing sang P3,000.
Samtang, may yara sang nagagwa nga alegasyon nga may yara sang karelasyon si Madam Bing nga isa ka anay station commander sang isa ka police station sa Bacolod City.
