Arestado ang duha ka notorious nga mga holdaper sa drug bust operation kun sa diin nakumpiskaran man ang mga ini sang armas-luthang.
Sa ginpatigayon nga drug bust operation kahapon sang Bacolod Police Station 4 kag koordinasyon sang Bacolod Police Station 3 kag Philippine Drug Enforcement Agency (PDEA) sa Purok Tultugan, Barangay Mandalagan, ciudad sang Bacolod, arestado sanday Ken Ryu Barrientos alyas Bubu, 20 anyos kag Martin John Beatingco, 33 anyos, lunsay mga wala sang trabaho kag residente sang Brgy Villamonte, Bacolod City.
Sa interview sang Bombo Radyo kay Police Captain Francis Depasucat, hepe sang Bacolod Police Station 4, gindala sang duha ka suspek ang poseur buyer sa ila ginarentahan nga balay sa Brgy Mandalagan, kag didto na natigayon nga maaresto ang duha.
Suno diri may mga pending nga kaso ang mga suspek kun sa diin si Barrientos makaagi na preso bangod sa illegal nga druga samtang si Beatingco naman ang isa sa mga suspek sa frustrated murder nga nagtiro sa isa ka collector sang isa ka motorcycle company sang nakaligad nga bulan sang Agosto.
Pahayag ni Depasucat, nagarenta sang motor ukon tricycle ang duha amo nga indi madali ang pagtrace sa ila kag kun bisan pa sa paglagas sa ila, madanlog nga makapalagyo ang mga ini.
Nakuha sa paghinakop sang duha ang 15 ka gramos sang suspected shabu nga nagabalor sang P102,000, 10 ka gramo sang suspected marijuana nga nagabalor sang P1,500 kag duha ka unit sang caliber 38 revolver nga may apat ka live ammunitions.
Ang duha ka suspek yara na sa kustodiya sang Police Station 4 nga magapangatubang sa kaso nga RA 9165 ukon Comprehensive Dangerous Drugs Act of 2002 kag RA 10591 ukon Comprehensive Firearms and Ammunition Regulation Act may kag COMELEC Resolution No. 10918 may kaangtanan sa Gunban.
