Nagpahanumdom ang secretary-general sang United Negros Drivers and Operators Center sa mga kaupod niya sa transport sector nga sundon ang fare matrix sa pagsukot sang pamasahe sang pasahero agud malikawan ang overcharging.
Ini ang kasunod sang reklamo sang isa ka estudyante sa Bacolod nga sobra ang ginsukot sa iya.
Suno sa estudyante, halin siya sa Libertad Market kag nagpanaog sa Pedrosa Subdivision nga sakop na sang Barangay Alijis apang ginsukot ini sang P20.
Nagpamilit pa ini nga indi siya magdiretso sa Handumanan kadungan sang pagkwestyon sang iya nga pamasahe nga P20 bangud may sinsilyo pa kuntani ini nga P6.
Sa interview kay UNDOC secretary-general Diego Malacad, naghingyo ini sang pasaylo sa natabo sa estudyante bangud sa miscommunication.
Suno diri, P14 lang kuntani ang pamasahe sang estudyante kag indi P20 bangud may 20 percent pa ini nga discount.
Gin-istorya ni Malacad ang driver kag ginremind nga kuntani ginlantaw man sini ang gin-punch sang konduktor.
Suno kay Malacad, ang pamasahe sang tion nga nagluntad ang COVID pandemic ang indi na mapatuman sa karon kundi pagasundon ang fare matrix nga gin-issue sang Land Transportation Franchising and Regulatory Board, sa baylo nga banta-bantaon lang sang driver ukon konduktor.
Nagpasalamat naman ini nga gintalakay ini sang Bombo Radyo bangud eye opener na ini sa tanan nga konduktor kag driver nga manukot lang sang nagakaangay nga pamasahe bangud ang operator ang manabat kun magreklamo ang pasahero.
