Para sa chairman sang Sentrong Samahan ng Tsuper at Operators – Negros (SSTONE) kaangay nga indi man sa gihapon mabatyagan ang saka nga P1 sa plete bangod bisan sa karun nga P12 nga plete, may mga driver kag pasahero nga nagaplete lang man sa gihapon sang P11 ukon P10.
Gin-aprubahan na sang Land Transportation Franchising and Regulatory Board (LTFRB) ang P1 nga provisional increase sa minimum nga plete para sa public utility jeepneys (PUJs) epektibo sa Domingo, Oktubre 8.
Sa interveiw sang Bombo Radyo kay Albert Villanueva, bangod sa P1 nga saka sa plete, gikan sa P12 nga minimum fare ini mangin P13 na para sa una nga apat ka kilometros nga byahe.
Suno diri, wala man ini sa gihapon sang epekto nga daw kaangay man sang nakaligad sang ginpatuman ang minimum fare nga P12 nga wala man ginasunod sang driver kag pasahero.
Pahayag ni Villanueva, indi man ma-implementar ang saka nga P1 sa plete kun indi mag proseso ang mga operators sa Land Transportation Franchising and Regulatory Board (LTFRB) Regional Office 6 nga nahamtang sa Iloilo.
Pagpa-athag sini, kun luyag sang mga operators kag drivers nga mapatuman ang saka nga plete dapat pa nila gastuhan ang plete, proseso kag balayran sa pagkuha sang fare matrix sa Iloilo nga posibel magdangat sa kapin P2,000 ang magasto samtang nagabalor sang P750 ang fare matrix.
Suno diri, posible nga may yara sang wala gana nga magproseso sang fare matrix kun tuman naman ka dako ang ila magasto kumpara sa piso nga saka nga kun kaisa wala man ginapatuman sang mga drayber kag commuters.
Panawagan ni Villanueva sa national government nga kun tani nangita ang mga ini sang husto nga solusyon sa problema sa byahe kag indi ang additonal sa plete nga ini naman makatuga sang posible nga pagsaka man sa presyo sang iban nga balaklon.
