Ginpatpat sang chairperson sang Committee on Laws and Ordinances sa Sangguniang Panlungsod ang mga isyu natuhoy sa Bacolod Real Estate Development Corporation (Bredco) Port nga naggwa sa ginpatigayon nga hearing.
Sa interview sang Bombo Radyo kay Coucilor Al Victor Espino, P300 billion ang commercial value sang 25 hectares nga kinahanglan idugang sa 250 hectares nga reclamation sa Bredco.
Ginklaro ni Espino nga ang ciudad sang Bacolod ang nagapanag-iya sang roro port kun sa diin developer lamang ang Bredco para sa reclamation project.
Isa sa mga isyu nga ila ginpaathagan sa hearing amo ang pagpanukot sang Bredco sa mga pasahero kun sila magsulod sa entrance.
Ginkwestyon sini ang ginahimo nga pagpanukot bangod sa idalum sang City Ordinance 454 ukon ang “takeover ordinance” klaro nga nabutang nga ang port ginapanag-iyahan sang ciudad.
Sabat ni Atty. Joselito Bayatan, legal counsel sang Bredco, kabahin lamang sang ila port operations ang ila pagpanukot apang suno kay Espino ang dalan nga gina-agyan sang mga pasahero ang indi man kabahin sang port operation.
Sa karun ginahulat pa ang sabat sang Bredco apang dako ang pagpati sini nga wala sang diretso ang Bredco sa pagsukot sa entrance sang reclamation.
Pahayag ni Espino, kun padayon nga nagapinagusto lang ka panukot ang Bredco, liwat na naman sini nga iduso ang pag-activate sang takeover ordinance nga ginpirmahan ni former Mayor Evelio Leonardia nga mangin isa ka layi kasunod sa bayolasyon sang Bredco sa comprehensive revised reclamation agreement.
