Ginbag-o ang route plan kag ginpalip-ot na lamang ang Street Dance Parade nga patigayunon sa Oktobre 22 may kaangtanan sa Masskara Festival 2023.
Sa interview sang Bombo Radyo Bacolod kay Mate Espina, public relations head sang Bacolod Yuhum Foundation kag spokesperson sa Masskara Festival 2022, ang pagbag-o sa route plan ang tuga sang suhestyon ni Bacolod City Mayor Alfredo “Albee” Benitez.
Gikan sa una nga plano nga magagikan sa SM City Bacolod kag madamo pa sang pagalabayan, ini ang ginsaylo na lamang sa replika sang Old Bacolod City Hall sa Plaza.
Suno kay Espina, sa nauna nga route plan, 17 tanan ka mga routa sang salakyan ang maapektuhan ang dalagan sang trapiko.
Sa karun, gikan sa replika sang Old City Hall, husuyon na lamang sang mga dancers ang dalan Araneta padulong sa Paglaom Sports Complex.
Dugang pa ni Espina nga indi naman magasaot ang mga Masskara Dancers kundi parade gid lamang ang patigayunon.
Bombo File photo
Ini bangod indi luyag sang alkalde nga maliwat ang natabo sang nakaligad nga Street Dance Competition kun sa diin madamo sang mga nagkalalipungan nga dancers.
Agud indi na mag-agunto ang mga kabataan sa pagsaot suksok ang mga mabug-at nga costume sa tunga sang mainit nga panahon, ginpalip-ot na lamang ang parade kag gindula na ang pagsaot.
Ang parade ang nakaplano nga mag-umpisa alas-2:00 sa hapon gani ginapaabot nila nga magaplastar ang mga Masskara Dancers sa dalan sa udto pa lamang sang Oktobre 22.
Pasalig naman sang mga ini nga magapabilin ang level sang competition pagdangat sa Arena Competition sa Paglaom stadium.
Sa pihak nga bahin, bangod deretso na lamang ang routa, ang isarado na lamang nga dalan amo ang Araneta Street nga malab-utan sang parade, samtang sarang naman nga magamit sang mga motorista ang dalan sa palibot.
Sa karun padayun pa nga ginadeliberate ang plano, gani ginapaabot na ni Espina nga may ara pa sang mangin pagbag-o.
Pasalig naman sini nga sa tion nga ma-aprubahan na ang tanan, magapagwa naman sang traffic plan ang Bacolod Traffic Authority Office (BTAO) agud magiyahan sang temprano ang mga motorista.
