Indi na magakinahanglan sang implementing rules and regulations (IRR) kag fare matrix ang mga pampubliko nga salakyan antes mapatuman ang P1 nga adisyunal nga saka sa pamasahe nga ginmando sang Transportation Franchising and Regulatory Board (LTFRB) Central Office.
Nahibaluan nga ang implementasyon sang fare hike ang maga-umpisa na sa Domingo, Oktobre 8.
Sa interview sang Bombo Radyo Bacolod kay Diego Malacad, Secretary-General sang United Negros Drivers and Operators Center (UNDOC), ang desisyon sa pagpatuman sang piso nga saka sa pletehan ang masakit man para sa mga drivers bangod ini ang tuman ka gamay kag indi makabatak sa nagakadula nga P250 tubtob P290 kada adlaw.
Sa pagpatuman sang piso nga fare increase ang anay P12 nga minimum fare ang magasaka na sa P13.
Paathag sini nga indi na kinahanglan nga magkuha pa sang fare matrix sang mga driver gikan sa LTFRB regional office, bangod ang fare increase ang marching order gikan sa Central Office sang ahensya.
Ini ang halos kaangay man sa natabo sang nagaduging ang COVID-19 pandemic, kun sa diin Nationwide ang implementasyon sang polisa.
Apang ginakasubo ni Malacad, nga tubtob lamang sa P1 ang nga saka sa pletehan ang marching order kag wala napagkit kun may pagsaka man sa kada succeeding kilometers.
Suno diri, mahimo nga nagbase ang Central Office sa Metro Manila nga napangtunga na ang kada routa agud indi maglapaw sa four kilometers, apang lain naman ang sitwasyon sa mga probinsya.
Gani bisan pa malayo ang byahe kag lapaw na sa four kilometers, magapabilin man sa piso ang pagsaka sa pamasahe.
Apang aminado si Malacad nga band-aid solution lamang ini bangod suno sa marching order provisionary fare increase lamang ang P1 nga ginpatuman gani ini ang mahimo batakon ano man nga oras.
