Nadakpan na ang tatlo ka mga suspek nga nanghold-up sa isa ka fuel station sa Sitio Golf, Brgy. Guinhalaran, Silay City, Negros Occidental kagab-i matapos nadakpan sa ginpatigayon nga hot pursuit operation sang mga pulis.
Sa interview sang Bombo Radyo Bacolod kay Police Major Sara Villanueva, officer-in-charge sang Silay City Police Station, ginhold-up ang 3MR Gasoline Station mga alas-10:30 ang takna kagab-i.
Suno kay Villanueva, ginpahayag sang pump boy nga ang tatlo ka mga suspek nga nagasakay sa motorsiklo ang nagpadulong sa nasambit nga gas station agud nga magpagas sang P40.
Apang sang nagpanaog ang mga ini, nagdeklarar na sila sang hold-up kun sa diin gintutok sang isa ka suspek sa pump boy ang .38 caliber revolver gani gilayon sini ginhatag ang kwarta kag nagpalayo samtang ginsulod sang mga suspek ang cashier booth sang gasoline station.
Sang makumpirmar sang mga police ang insidente, gilayon ang mga ini nagtawag sa Talisay City Police Station kag EB Magalona Municipal Police Station agud nga magpatigayon sang dragnet operation.
Nadakpan sang Silay City Police Station ang duha ka mga suspek sa checkpoint sa Sitio Golf, Brgy. Guinhalaran kaina sang kaagahon bangud nagmatch ang mga ini sa ginlaragway sang biktima.
Ginkilala ang mga ini nga sanday Joseph Garrucho, 24 anyos; single, residente sang Bonifacio Ext., Brgy 4, Silay City; kag Christian Balili, 18 anyos kag residente sang Purok Kahilwayan, Brgy. 2, Silay City.
Samtang ang isa naman nga nagalakat lang kag tabok boundary sang Silay kag Talisay City ang nadakpan man sang Talisay City Police Station kag siya ang ginkilala nga si Zyne Daniel Conlu nga residente sang Silay City.
Nakuha sa mga ini ang isa ka unit sang .38 caliber revolver nga loaded sang duha ka live ammunition; tatlo ka heat sealed transparent plastic sachets sang suspected shabu nga may bug-at nga 12 grams kag ginabanta nagabalor sang P81,600.
Suno kay Villanueva, ang background sang mga suspek ang noted sa ciudad sang Silay nga nagapangsulod sa establishments agud magpangawat kag magpanghold-up.
Bangud sini, sila ang mangatubang sang kaso nga robbery, violation sang RA 9165 ukon Comprehensive Dangerous Drugs Act of 2002; RA 10591 o Comprehensive Firearms and Ammunition Regulation Act in relation to COMELEC GUNBAN.
