Padayon sa gihapon ang imbestigsayon sang Salvador Benedicto Municipal Police Station sa pagtumod sa suspek nga nagpatay sa isa ka mangunguma sa Purok Paglaum, Barangay Kumaliskis sang Martes, kapin alas 2:00 sang kaagahon.
Sa interview sang Bombo Radyo kay Police Major Rey Tolosa, hepe sang Salvador Benedicto Municipal Police Station, ila nabaton ang report gikan sa punong barangay sang Barangay Kumaliskis nga may yara sang ginpatay nga persona paagi sa pagluthang kag pagbuno sa liog.
Ginkilala ang biktima kay Jolito Larigo, 54 anyos, bulag sa asawa, may walo ka mga kabataan kag residente sang amo nga lugar.
Suno kay Tolosa, ila ginpadulongan ang area kag sa nakuha nila nga impormasyon sa amay sang biktima nga si Antonio Larigo, magkatupad ang kwarto nila nga duha sang iya bata kag sang kaagahon may nabatian ini nga lupok apang wala na ini nagbangon pa.
Matapos ang kapin isa ka oras, gintsekyar sini ang iya bata kag didto na nga nakita sini nga wala na ini sang kabuhi.
Pahayag ni Tolosa, padayon ang ila imbestigasyon sa pagtumod sa suspek kag motibo sa pagpatay.
Nagapati si Tolosa nga tumod gid lamang sang suspek nga patyon ang biktma bangod wala man sang pagkabutang ang biktma nga nadula.
Sila man ang nagakoordinar sa pamilya sang biktima nga ila gin-ingganyo nga ipaidalum sa post-mortem examination ang bangkay sa posibilidad nga may makuha diri nga dugang nga ebidensya.
Samtang, narekober naman sa crime scene ang duha ka basiyo sang 45 calibre pistol nga ginpaidalum sa ballistic exanmination.
