Liwat nga may nadakpan nga isa pa ka suspetsado sa asod-asod nga mga kinawatay sa syudad sang Bacolod kahapon.
Ginakunsiderar sang Bacolod City Police Office (BCPO) Director nga magaserbe na nga paandam ang pagkadakop sang mga hold-upper sang Huwebes sang gab-i sa mga iban pa nga nagahimo sang kaangay nga iligal nga buluhaton.
Madumduman nga na-intercept sa dragnet operation sang Talisay City Police Station kag Bacolod Police Station 7 diri sa Purok Pag-asa, Barangay Alijis, Bacolod City ang tatlo ka mga hold-uppers nga nagsulod sa Shopee Express Hub sa Barangay Zone 12, Talisay City.
Sa interview sang Bombo Radyo Bacolod kay Bacolod City Police Office (BCPO) Director Police Col. Noel Aliño, bangod may asod-asod man nga insidente sang kinawatay sa syudad, nagcontact ini kay Negros Occidental Police Provincial Office (NOCPPO) Director Police Col. Leo Pamitan, nga classmate man sini Philippine National Police Academy (PNPA) agud sila ang magkoordinar.
Gin-athag sini nga sa tion nga mainit na ang mga suspetsado sa syudad sang Bacolod, dako ang posibilidad nga sila ang magasaylo sang target sa Negros Occidental vice versa.
Bangod man sini, nagtukod ang BCPO sang Bacolod City Police Anti-Holdupper and Akyat Bahay (BHAB) nga ginabug-usan sang mga intelligence operatives kag iban pa nga units sang kapulisan.
Si Col. Aliño ang yara man mismo sa field sang na-intercept ang mga nakabullet proof nga mga hold-upper.
Dugang pa sang BCPO Director nga kahapon, may-ara sila sang dugang nga nadakpan gikan sa mga suspetsado nga asod-asod nga kinawatay sa syudad samtang sila ang nagapatigayon pa sang mga follow-up investigation.
