Opisyal na nga nag-umpisa kahapon ang selebrasyon sang Masskara Festival 2023 nga natigayon nga may kalinong kag katawhay.
Kagab-i, bisan matawhay kag wala sang pagginutok sang mga tawo sa Bacolod Public Plaza, madamo sang mga nagpadulong para magtambong sa programa sang ciudad, live band kag para magtilaw sang sari-sari nga inasal.
Sa interview sang Bombo Radyo kay Ella Marie Sonido, siya nagatrabaho bilang isa ka call center agent kag sa free time sini, siya nagabantay sa negosyo sang ila pamilya nga amo ang pagbaligya sang inasal.
Ang ila baligya nga mga inasal may kapares nga promo nga unli rice kun sa diin ang pecho pak nagabalor sang P140, paa sa P120 kag Liempo sa P110.
Samtang, ang bangrus naman nagabalor sang P200, atay sang baka nga P25 kag tocino nga P25.
Nagsaka man sa tag P5 ang tagsa ka presyo sang mga ilimnon.
Aminado man ini nga nagmahal ang ila baligya kumpara sang nakaligad nga tuig bangod nga nagsaka man ang presyo sang mga balaklon.
Suno kay Sonido, maayo nga nagnubo ang bayad sang kiosko nga ila gina-avail sa P18,000 kun sa diin nakaligad nga Masskara Festival, P25,000 ang balor sang renta sa kiosko.
Pahayag ni Sonido, gina-ekspektaran sini ang pagdamo pa gid sang mga costumer kasunod man sa husto nga preparasyon sang ciudad kag indi na tuman ka strikto nga health protocol.
Samtang, hugot man ang pagbantay sang mga kapulisan sa mga entrance kag exit sa Bacolod Public Plaza.
Sa interview sang Bombo Radyo sa police personnel nga nagabantay sa entrance, sa karun wala sila sang nakumpiskar ukon nadakpan nga may dala nga kontrabando.
Suno diri, ila ginatsekyar ang mga bag sang mga nagasulod sa plaza nga bisan screw driver indi wala ginapahanugotan nga madala sa sulod sang plaza.
May yara man sang medical personnel sa area inkaso nga may matabo nga insidente.
