Patay ang driver sang truck nga nagakarga sang tubo matapos nga makuryente sa Barangay Vista Alegre, Bacolod City.
Sa interview sang Bombo Radyo Bacolod kay Police Captain Andy Ofalia, officer in charge sa Bacolod Police Station 7, ang biktima ang ginkilala nga si Charlie Salmorin, 36 anyos, kasado kag residente sa Barangay Sag-ang, La Castellana, Negros Occidental.
Sa imbestigasyon, nahibaluan nga sa Barangay Vista Alegre nagkarga sang tubo ang biktima, apang sang ini ang nagabyahe nasalawid ang karga sini nga tubo sa kable sang isa ka internet provider.
Bangod indi makalarga ang salakyan kag wala man ini sang helper, nagpanaog si Salmorin kag ginsaka ang karga agud nga paluson ang nakasab-it nga kuryente.
Nahimo pa nga kuhaon sang driver ang pila ka mga nasab-it nga kuryente, tubtob nga siya ang nakatandog sa isa ka open wire kag nakuryente.
Bangod sa mataas nga electric current, nasunog ang biktima kag nakaangkon man sang pilas ang iya nawala nga tudlo.
Sa pagresponder sang Bacolod City Disaster Risk Reduction and Management Office (CDRRMO) wala na sang pulso ang biktima gani ini ang gindeklarar nga wala na sang kabuhi.
