Ginpahayag sang Overseas Filipino Worker nga 17 ka tuig na nga nagatrabaho sa Israel, sa maragtas sang pungsod sa giyera, ginakabig sini ang karun nga sitwasyon ang pinakalala kun sa diin bata kag babayi ginaparada sa dalanon nga wala sang panapton.
Sa interview sang Bombo Radyo Bacolod kay Bombo International News Correspondent Alona Yunting, derekta sa Israel, nagsugod naman ang pagpamahog sa North Israel naggikan sa pagpangbomba sang Lebanon nga nagasuporta man sa Hamas.
Suno diri, gin-evacuate na sila sa area kag gindala sa shelter para sa safety.
Kaupod sini ang pila man ka mga Pilipino sa shelter.
Kumpleto sa importante nga kinahanglanon ang shelter kun sa diin ginadal-an sila sang Israel military sang mga pagkaon, tubig, bayo kag iban pa.
Wala man sang byahe samtang sila ginbawalan nga maggwa kag sa paglaragway sini, ang Israel kun lantawon kaangay nga isa ka ghost town.
Apang, nagpasalig si Yunting nga kontrolado pa sang Israel ang sitwasyon sa naaminhan nga bahin.
Pahayag ni Yunting, sa South Israel, nga amo ang gin-atake sang Hamas, bisan ang mga Pilipino nga yara didto apektado sa kinagamo.
Wala man nakaluwas ang mga bata kag babayi nga ginaparada sa dalanon nga wala sang panapton kag bisan mga sibilyan ginaharass, gina-abduct kag ginapatay.
Samtang, kahapon naman ginbuy-an na sang Hamas ang mga hostage nga taga- Thailand.
