SA ISRAEL – Kadungan sang kaadlawan sang isa ka Pinay sa Israel, wala ini sang liwan nga pangamuyo kundi hilwayon sang Hamas militants nga buhi ang iya abyan nga si Lorie Alacre kag iban pa nga mga Pinoy nga ila gin-abduct kag ginhostage sa Gaza Strip sang Sabado.
Suno kay Bombo international news correspondent Rosalina Diamante, nagkit-anay pa sila ni Alacre sang Biyernes sang hapon apang nakamuno ini nga may laktan siya pagka-Sabado.
Base sa iya nahibaluan, si Alacre ang naglagaw sa sakop sang Palestine kaupod ang iya kahagugma nga isa ka Chinese apang sila ang nadakpan sang Hamas samtang yara sa salakyan.
Gintiro sang Hamas ang iya kahagugma sa likod kag ginbilin bangud sa pagdumdom nga ini ang patay na, apang ini ang nakaluwas kag yara sa karon sa Asquilon Hospital, samtang ila naman gindala si Alacre sa Gaza Strip kaupod ang iban pa nga hostages.
©web photo
Ginalantaw ni Diamante nga una nga ginhostage sanday Lorie antes ang massacre sa Sukkot Festival kun sa diin 270 ka mga tawo ang nagkalamatay.
Ginapangita kuntani nila ang nobyo ni Alacre agud mahibaluan kun ano ang matuod nga natabo, apang indi pa makasulod sa Asquilon Hospital.
Suno sa Pinay, wala siya sang liwan nga pangamuyo kundi makagwa si Alacre nga buhi kaupod ang tanan nga hostages.
Suno diri, malapit gid sila nga mag-abyan ni Alacre, isa ka caregiver nga tumandok sang Cadiz City, bangud siya ang taga-Silay man diri sa probinsya sang Negros Occidental, kag masami sila nagakitaay.
Kaina sang aga, nakabaton sang report sanday Diamante nga ang isa ka Pinay nga si Angelyn Aguirre nga kaupod ni Alacre nga ginhostage ang patay na, apang ginahulat pa diri ang kumpirmasyon sang Philippine Embassy.
