Subong na nga hapon matumod ang mga semi-finalists sa billiards tournament sang MassKara Festival 2023.
Suno kay Mate Espina, public relations officer sang festival organizer nga Bacolod Yuhum Foundation, 32 ka players ang magasulod sa semi-finals kag 16 na ang naidentify kaina sang aga nga tournament.
Kaina sang udto, naghampang sa exhibition game sanday Efren ‘Bata’ Reyes kag ang 9 anyos nga si Chasz Uy, ang youngest contestant nga nagsign up para sa billiards tournament.
Base sa resulta, ginpierde ni Uy si Reyes sa score nga 4-1.
Suno diri, isa ini ka dungog para sa 9 anyos nga makahampang batok sa legend sang billiards.
Subong nga hapon, naghampang man sanday Bacolod City Councilor Jason Villarosa kag Django Bustamante nga nakasulod na sa semi-finals.
Bwas nga adlaw, magateam up si Mayor Alfredo Benitez kag Reyes batok kanday Bustamante kag Councilor Vladimir Gonzales.
Subong man nga hapon, patigayunon ang Best in Talent kag Best in Festival Costume competition sang Miss MassKara Bacolod sa event center sang Ayala Capitol Central sa Gatuslao Street.
