Nabuhinan na sang tatlo gikan sa lima ka mga guerilla front ang rebelde nga New People’s Army (NPA) sa Negros Island.
Sa press conference sang Local Task Force to End Local Communist Armed Conflict (LTF-ELCAC), ginpahayag nga may-ara anay sang anom ka mga guerilla fronts ang NPA sa Komiteng Rehiyon Negros-Cebu-Bohol-Siquijor (KR NCBS) kun sa diin lima diri ang naga-operate sa Negros Island.
Gikan sa lima ang nadismantle na ang Northern Negros Front, Central Negros Front kag Southeast Front samtang naghuyang naman ang pwersa sang Central Negros Front 2 kag Southwest Front.
Ginpakamaayo ni Negros Occidental Governor Eugenio Jose “Bong” Lacson nga sa malawig nga pagpakigbato sang Philippine Army, ini ang nakaangkon gid man sang maayo nga bunga.
Gindayaw man sini ang efforts nanday 3rd Infantry Division Commander Major Gen. Marion Sison kag 303rd Infantry Brigade Commander Brig. Gen. Orlando Edralin sa pagpanubo sang numero sang guerilla fronts nga naga-operar sa Panay kag Negros Island.
Aminado ang gobernador nga tuman ka importante ang kawsa sang mga militar nga mapakigbatuan ang makawala nga grupo agud mapromote ang kalinong kag katawhayan sa palibot kag mapangapinan ang seguridad kag interes sang pungsod.
Panugyan naman ni Lacson nga ipabilin kag tinguhaan pa nga makatuga sang mas maayo nga resulta sa peace process sang probinsya.
Isa sa nakita sang gobernador nga maayo nga resulta amo ang pagpakigbahin sang mga gikan sa anay conflicted areas sa Negros Trade Fair sa Makati kalakip na diri ang mga anay rebelde nga nagbalik na sa sabak sang gobyerno.
Nagapati ini nga sa paghatag sang gobyerno sang mas maayo nga banas para sa kalinong, pagpalab-ot sang basic services, paghatag sang development assistance, participatory initiative, gani nagadamo ang nagapili nga magbuya na sa ila mga armas kag magbalik sa sabak sang gobyerno.
Panawagan ni Lacson sa mga nabilin pa sa kabukiran nga mga NPA members nga magpanaog naman kag magsungka na agud magpangibabaw ang kalinong, hustisya kag pagkamaluluy-on.
As of 3rd quarter subong nga tuig, ginapahayag nga ang NPA rebels ang may-ara nalang 53 ka miyembro kag 197 ka mga armas-luthang.
Humalin Enero 1 tubtob karun, ang makawala nga grupo ang nakapatigayon na sang 51 ka mga violence activities nga nagtuga sang kamatayon sang 34 ka sibilyan, lima ka suldado, tatlo ka mga anay NPA members, apat ka Government officials kag isa ka Police personnel.
May-ara man sang tatlo ka insidente sang pagpangsunog sang mga construction equipment.
Ang mga aktibidad ang lunsay gin-ako sang mga NPA ang kahimuan pinaagi sa pagpublish sa ila website.
