Nasapwan kahapon sang aga nga wala na sang kabuhi ang 10 anyos nga bata nga naanod sa suba sa banwa sang Salvador Benedicto sang Lunes.
Sa interview sang Bombo Radyo Bacolod kay Police Major Rey Tolosa, hepe sang Salvador Benedicto Municipal Police Station, alas-7:00 sang gab-i sang Oktobre 9, papauli na kuntani nagikan sa Purok Humayan, Barangay Pinowayan, Salvador Benedicto ang mag-asawa upod sa ila duha ka kabataan kun sa diin sila ang nagsimba.
Apang agud makapauli sa Purok Malipayon sa nasambitan nga Barangay, sila ang kinahanglan pa nga magtabok sa Bago river.
Ginakaptan sang amay ang agot nga bata samtang kaupod naman sang iloy ang 10 anyos nga biktima.
Apang bangod sa maulanon ang nasambitan nga gab-i, nangin mabaskog man ang current sa suba, nga nagtuga agud mabuy-an sang iloy ang iya 10 anyos nga bata.
Bangod sa madulom na ang kagab-ihon kag mabaskog ang daludo sang tubig wala gilayon nasapwan ang bata.
Nagpatigayon man sang search and retrieval operation ang Barangay kag Municipal Disaster Risk Reduction and Management Office para sa bata apang ini ang nasapwan lamang kapin alas-10:00 kahapon sang aga sa higad sang suba nga sakop sang Purok Saging, Barangay Bunga, Salvador Benedicto.
