Kabug-usan nga 447 ka police personnel nga nagikan sa Negros Occidental Police Provincial Office (NOCPPO) ang iga-augment sa pagsiguro sang kalinong kag katawhay sa pagselebrar sang Masskara Festival subong nga tuig.
Ginalakipan ang 447 sang 26 ka Police Commissioned Officers kag 421 ka Police Non Commissioned Officers.
Sa interview sang Bombo Radyo Bacolod kay Police Lt. Col. Ronnie Brillo, commander sang Bacolod City Mobile Force Company (BCMFC) kag deputy city director for operations sang Bacolod City Police Office, gindeploy na ang 447 ka mga kapulisan nagikan sa NOCCPO kaina bilang augmentation sa mga kapulisan sa ciudad sang Bacolod para magbantay sa Masskara Festival 2023 samtang natalana man nga magaabot ang kapin 1000 personnel gikan sa PRO6 nga tungaon sa duha ka batch, kun sa diin ang 500 ang maabot subong nga semana samtang ang 500 ang natalana nga mapadulong sa ciudad sa madason nga semana antes ang highlights sang Masskara Festival.
Suno kay Brillo,ginpatigayon na kaina ang send off ceremony sang nasambit nga augmentation force para sa Masskara Festival 2023.
Nagpadulong man sa ciudad sang Bacolod ang regional director sang Police Regional Office 6 kaupod ang regional deputy for operations sang PRO-6 agud nga magpreside sang ginpatigayon nga meeting sa mga police personnel antes gindeploy para sa augmentation sa pagsiguro sang seguridad sa pagselebrar sang Masskara Festival.
Tinutuyo sang mga otoridad nga matapos ang pagselebrar sang Masskara Festival nga wala sang nagluntad nga insidente.
