Kalmado na sa karun ang sitwasyon sa Israel apang sa bahin sang Gaza sa Palestine mabatian sa gihapon ang makusog nga paglupok sang bomba kag pagkawasak kag pagkaguba sang mga buildings.
Sa interview sang Bombo Radyo kay Elvie Aviador Pregua, Bombo Intenational News Correspondent direkta sa Tel Aviv, Israel, alas 6:30 sang aga sang Sabado, nakabati ini sang sunod-sunod nga lupok sang mga rockets gani gilayon ini nga nagdalagan kag ginkuha ang iya amo nga indi pa kuntani magsulod sa bomb shelter bangod normal man lang ang paglupad sang rockets sa ila, apang suno kay Pregua, sunod-sunod na ang paglabay sang kapin 5,000 ka rockets.
Suno diri, nagtinir sila sa bomb shelter tubtob nga nagtawhay ang sitwasyon.
Sa karun padayon pa ang pagpangita sang Israel army sa tatlo ka miyembro sang Hamas nga wala pa nakit-an, ini matapos nga may pulo ka Hamas militant nga nakasulod sa ila area paagi sa parachute.
Pahayag ni Pregua, kun sila maggwa para mag-grocery, kada stores may yara sang nagabantay nga army kag ginasiguro nga wala sang magtinir kag maglagaw samtang indi pa safe ang dalan.
photo from web
Naghatag sang kasiguraduhan si Pregua nga naga-amat amat na linong ang sitwasyon sa Israel apang sa Gaza, mabatian ang padayon nga paglupok sang mga bomba kag pagkalarumpag sang mga buildings.
Dugang pa niya, sa walo ka tuig sini nga pagtrabaho sa Israel subong gid lamang ini naka-eksperyensya sang tuman ka dilikado nga sitwasyon sa konflikto sa tunga sang Israel kag Palestine kun sa diin madamo sang nagkalamatay, lakip na ang mga lapsag kag kabataan nga ginapang-utdan sang ulo.
Apang, para kay Pregua magatinir man ini sa gihapon sa Israel para magtrabaho bangod nga kumpara sa Pilipinas, dako ang sweldo kag madamo sang benepisyo.
Suno kay Pregua, sa iya nabaton nga latest nga report may yara sang duha ka Pilipino nga yara sa ospital samtang sa iban naman nga na-missing indi pa matumod ang ila sitwasyon bangod madamo sang tawo ang napatay, ginhostage kag ang iban ang nasunog gani indi pa mahibaluan ang iban nga mga identity.
