Naglunsyar kahapon sang Oplan Ligtas Biyahero ang Philippine Coast Guard- Northern Negros Occidental para sa seguridad sang mga nagabayahe sa baybayon kadungan sang MassKara Festival 2023.
Sa interview sang Bombo Radyon kay PCG-Northern Negros Occidental station chief Commander Joe Luviz Mercurio, ang Oplan Ligtas Biyahero ginlunsyar para mapabakod ang safety kag security sa mga ports kag vessels.
Tinutuyo man sini nga mahatag sa mga nagabyahe pasulod kag paggwa sa ciudad ang husto nga serbisyo.
Suno diri, iya naman naekspektaran ang pagdagsa sang mga bisita sa Negros Occidental ilabi na sa ciudad sang Bacolod para magtambong sa Masskara Festival kag makigbahin sa Barangay and Sangguniang Kabataan Elections.
May yara man sang sea marshall nga naga-upod sa byahe sa roro nga sarang mapalapitan kun may kinahanglanon kag sila man may gintukod nga help desk.
Mensahe ni Mercurio sa tanan, nga yara sa port ang PCG-Northern Negros Occidental para mag-inspect, magserbisyo kag maghatag sang seguridad.
