Nagpasalig ang secretary sang Department of Migrant Workers sa pamilya ni Loreta Alacre ang caregiver sa Israel nga ginpatay sang Hamas militants sang Sabado nga ang gobyerno ang magahatag sang bulig sa ila.
Sa interview sang Bombo Radyo Bacolod kay Secretary Hans Leo Cacdac, ginmanduan na sila ni President Ferdinand “Bong bong” Marcos Jr. nga ihatag ang tanan nga bulig nga kinahanglan sang nabilin nga pamilya sang napatay nga caregiver sa tunga sang giyera sang Israel kag Palestine.
Suno kay Cacdac, sa repatriation naman, may yara lamang sang proseso nga kihanglan himuon sa Israel kag indi magdugay matigayon gid ini.
Ginpahayag man ni Cacdac nga ang opisina sang Department of Migrant Workers kag ang opisina ni Congressman Greg Gasataya ang nagabuligay agud nga mahatagan ang nalisdan nga pamilya.
Suno diri, hulaton nalang ang iban pa nga announcements nagikan sa Malacanang.
Ginpahayag sang Labor communications Officer 6 sang Overseas Workers Welfare Administration-Regional Office 6 nga mahimo nga makaavail ang nalisdan nga pamilya ni Loreta Alacre sang bereavement assistance nagikan sa OWWA.
Sa interview sang Bombo Radyo kay Aldia Grace Bunyi, ginaengganyo sini ang mga himata ni Lorie nga makig-angot sa ila opisina agud nga ma-assist man sila kun ano ang kinahanglan agud nga makaavail sila sang nasambit nga assistance ukon mahimo man nga mag-inquire sa official website sang OWWA.
Suno pa kay Bunyi, may yara man sang scholarship nga ihatag ang nasambit nga ahensya para sa nabilin nga dependents ni Lorie.
Ginpasalamatan man sang magulang ni Loreta Alacre ang Bombo Radyo matapos nga natigayon nga mapakig-angutan ang Department of Migrant Workers kag ang Overseas Workers Welfare Administration (OWWA) Regional Office 6.
Sa interview sang Bombo Radyo kay Anabella Alacre, nagmag-an ang pamatyag sini bangud may yara na sang nagpasalig sa ila sang bulig.
Suno kay Anabella, sa tion nga madala na pabalik sa Pilipinas ang bangkay ni Lorie, dal-on nila ini sa ciudad sang Cadiz agud didto na igalubong.
Nagapasalamat si Anabella sa nasambit nga ahensya sang gobyerno nga nagpasalig sa ila nga maghatag sang nagakaigo nga bulig.
