Tuman ang kalisod nga nabatyagan sang pila ka mga abyan ni Loreta Alacre sa Israel, matapos nga ini ang mapatay sa kamot sang mga Palestinian militants nga Hamas.
Sa interview sang Bombo Radyo Bacolod kay Bombo International Correspondent Rosalina Diamante, derekta sa Tel Aviv, Israel, ginakabig na sini nga best friend si Alacre.
Paathag sini nga nagkitaay pa sila sang Biyernes sa Takana Merkazit, isa ka mall sa Tel Aviv nga masami ginatiponan sang mga Pilipino bangod diri madamo sang nagabaligya sang Filipino foods.
Hugot nga nagapati si Diamante nga sala ang naggwa nga mga impormasyon nga si Alacre ang nakaupod sa mga napatay sa Sukot Festival sa Re-im, nga malapit sa Gaza border, bangod wala man ini nagatambong sa nasambitan nga okasyon.
Sa ihibalo sini, si Alacre ang nagpadulong sa Ashkelon kun sa diin nagapuyo ang iya boyfriend nga Chinese National nga una na nga nareport nga natiruhan kag yara karun sa ospital.
Sa pagdumdom Diamante, magkaupod sila ni Alacre sa Takana Merkazit kag antes maglakat padulong sa Ashkelon siya ang ginlibre pa sang abyan.
Pahayag sini nga kadungan sa iya kaadlawan sang Oktobre 10, ang ginpangabay gid lamang sini amo nga mapabilin nga luwas si Alacre, kag wala naman sini ginpinsar apisar nga bag-o lamang naka-utang ang biktima sang baligya sini nga alahas.
Paathag sini nga malapit gid sila sang biktima bangod masami sila nga nagakitaay kag ginapadulungan man sini si Lorie kun kis-a sa iya employer kun ini ang magrequest sang massage.
Suno diri, nakumpirmar lamang nila nga patay na ang abyan sang magpahibalo ang isa ka Israeli group nga isa ang bangkay ni Lorie sa ila nga mga narecover kag ini ang gindala na sa morgue.
Wala naman sang may ginpagwa nga dugang nga detalye kun sa diin kag kun paano narecover ang bangkay ni Alacre.
Nagaplano pa kuntani sila nga magtipon-tipon nga mga Pilipino, kag tuyo sini nga updon si Alacre, apang ini ang indi na nila madayun bangod sa kinagamo.
Padayun man ini nga nagapakig-angot sa Philippine Embassy para sa dugang nga impormasyon.
