Nagahilibion nga ginsaysay sang isa ka Pilipina nga residente na sa Israel, nga siya pa ang nagmanicure kay Loreta Alacre antes ini maglakat sa lugar kun sa diin siya ginpatay sang Palestinian militants nga Hamas.
Sa interview sang Bombo Radyo Bacolod kay Bombo International Correspondent Cristy David, siya ang 23 ka tuig na sa pungsod matapos makapamana sang Israeli national.
Duha naman ini ka tuig nga nagamanicure kag nagabaligya sa Takana Merkazit, sa Tel Aviv kun sa diin ginabaligya ang madamo nga mga Filipino foods.
Suno kay David, si Alacre ang nagbisita sa iya sang Biyernes, kadungan sa day off sini sa trabaho kaupod kay Rosalina Diamante.
Tinuig naman sini nga customer si Alacre kag sang Biyernes ginpadali pa ini sang abyan sa pagmanicure bangod ini ang may pagalaktan.
Nagbakal man ini sang pineapple nga iya ginabaligya nga amo man ang ginhatag ni Alacre kag Diamante.
Tuman ang hilibion ni David sa pagdumdom nga ang tion nga sila ang nagasinadya amo na ang ulihi nga tion nga masaksihan nila ang kadlaw ni Alacre.
Paathag pa sini nga si Alacre ang mabuot nga persona kag mahilig maglahog.
Nakibot na lamang ini sang siya ang gintawagan sang iya assistant sa negosyo sang Sabado nga si Lorie ang isa sa mga namissing nga Pilipino bangod sa pag-atake sang Hamas sa Israel.
Tuman man kasakit para sa iya sang makumpirmar na nga wala na ang abyan.
Nagpalab-ot man ini sang pagpakig-unong sa pamilya sang tatlo ka mga OFW nga napatay nga ginalakipan nanday Angeline Aguirre sang Pangasinan kag Paul Vincent Castelvi sang Pampanga kasubong man kay Loreta Alacre sa Cadiz City, Negros Occidental.
Aminado ini nga sa karun nga sitwasyon sang Israel, kaangay nga yara na sa lulubngan ang pihak nga tiil sang mga overseas Filipino workers (OFWs) gani pangamuyo na lamang sini nga indi na madugangan pa ang mga maulamid kag mapatay sa gyera.
Panawagan sini sa mga may himata sa Israel nga kumustahon ang ila mga pamilya sa magamo nga pungsod bangod ini ang dako na nga bagay para sa mga OFWs.
Apisar nga luyag ni David nga makapauli na sa Pilipinas kag sugot man ang bana sini nga sa Pilipinas na lamang magtinir, apang aminado ini nga sila ang mabudlayan bangod madamo pa sang proseso nga kinahanglan asikasuhon partikular na ang iya nga bana.
