Indi sa gihapon makapati ang abyan man ni Loreta Alacre sa natabo diri nga ulihi nga nasambit nila sa isa kag isa amo nga maghalong.
Sa interview sang Bombo Radyo kay Bombo International News Correspondent Marina Galsim direkta sa Israel, residente sa probinsya sang Pampanga, Oktubre 6, alas 5:30 sang hapon sang nanuktok si Loreta sa iya nga kwarto para magbayad sang renta sang timprano bangod nga may laktan ini kag posible nga indi makabalik.
Ginbaton ni Galsim ang kwarta kag paghalin ni Loreta ulihi sini nga ginhambal amo nga “maghalong ka” kag amo man nga ginsabat niya si Loreta nga maghalong man.
Suno diri, sang Sabado sang wala na sila sang komunikasyon kay Loreta tuman ang ila kakulba nga wala sila sang tulog sang panumdumon kag sang ila nabaton ang balita nga nakit-an na ini kag wala na sang kabuhi, tuman ang kasubo nga ila nabatyagan kag lunsay nagtulo ang ila luha.
Samtang, bisan tatlo ka bulan pa lang nga nakaupod ni Marieta Mendoza sang Pampanga si Loreta, para sa iya si Loreta ang nagtindog bilang nanay nila nga tanan.
Sa interview sang Bombo Radyo kay Bombo International News Correspondent Marieta Mendoza direkta sa Israel, mapisan nga abyan si Loreta nga halos indi sini luyag nga may makit-an nga lapta kag masami pa ini nga magluto kag magpanuktok sa kada kwarto para agdahon nga magkaon.
Ulihi sini nga nakita si Loreta sang Biyernes nga nasugat-an sini papasaka sa ila nga Boarding house, kag siya ginpamangkot ni Loreta kun diin siya makadto, ginsabat man ni Mendoza nga madeliver ini sang iya mga ginabaligya.
Ulihi man nga nahambal sa iya ni Loreta nga maghalong ini.
Natalana nga mapauli kun tani si Loreta sa Disyembre kun sa diin nauna na sini padala ang iya mga gamit kag bayo diri sa Pilipinas.
