Nakabaton sang dugang nga financial assistance ang pamilya sang Overseas Filipino Worker nga si Loreta Alacre nga ginpatay sang miltante nga grupo nga Hamas sa Israel.
Nagpadulong si Rizalino Roxas sa pamilya Alacre sa Barangay Cadiz Viejo, Cadiz City kaina sang aga para ihatag ang P500,000 financial assistance naggikan kay House Speaker Ferdinand Martin Romualdez.
Sa interview sang Bombo Radyo kay Roxas, indi lamang ini ang bulig nga mahatag sa pamilya apang madamo pa sang paga-ekspektaran nga bulig nga maabot.
Suno diri, posibel pa nga pagabuligan man sang mga nagkalain-lain nga departamento kag ahensya ang pagpalubong kay Loreta.
Samtang, wala pa sang final nga schedule sa pag-abot sang bangkay ni Loreta suno sa alkalde sang ciudad sang Cadiz.
Sa interview sang Bombo Radyo kay Cadiz City Mayor Salvador Esacalante, nag-abot kahapon ang isa ka utod ni Loreta naggikan sa Kuwait kag indi na luyag pa sang pamilya nga pabalikon ini sa trabaho sa luwas sang pungsod.
Suno diri, walo ka mag-utod sanday Loreta kag siya ang breadwinner sang pamilya.
Pahayag ni Escalante, preparado na ang tanan para sa pag-abot sang bangky ni Loreta, kun ano nga punerarya ang makuha kag nagpahanhugot man ang pamilya nga ihamtang si Loreta sa simbahan sa posibilidad nga magdugok ang mga tawo.
Apang sa karun wala pa sang final nga schedule kun san-o maabot ang bangkay ni Loreta sa Pilipinas.
