Nagpadangat sang reklamo ang isa ka residente sang Barangay Don Jorge Araneta, sa ciudad sang Bago matapos gin-alegar sini nga gina-utoy utoyan kadlaw, ginhambalan sang indi maayo nga tinaga kag ginpahog pa nga tiruhon sang isa kandidato ang iya amay nga nagatindog sa gwa sang ila balay sang naglabay ang caravan sang mga ini.
Sa interview sang Bombo Radyo Bacolod Jona Marie Gregorio, una na nga nagpangbalay-balay ang incumbent nga Punong Barangay sa ila nga purok nga ginapanugyan nga botohon sang ila nga pamilya.
Suno kay Gregorio, nakita niya sa video kag nabatian niya ang pahayag sang kandidato nga “ SULOD NATO TIYOY” kag may indi pa maayo nga tinaga nga ginbuy-an nga ginsundan sang pagpamahog nga ini ang iya tiruhon.
Suno diri, apisar nga wala sang pangalan nga ginhinambit, apang nakahibalo siya nga ang amay niya ang ginatumod bangud ginatawag niya ini nga Tiyoy.
Suno kay Gregorio, ang ginareklamo sini amo si Cleo Rema nga nagapadalagan bilang Punong Barangay sa Barangay Don Jorge Araneta.
Dugang pa sini, luyag lamang nila nga magsabat si Rema kun ngaa naghambal ini sang indi maayo nga tinaga kag nagpamahog pa santo sa nakuha niya nga video.
Suno kay Gregorio, kinamatarong sang mga ini kun sin-o ang ila nga botohon.
Napablotter naman nila ang insidente bangud may yara sang pamahog para sa ila nga amay kag nakahibalo gid ang nasambit nga kandidato nga kontra partido ang mga ini.
