Napuno ang Bacolod City Public Plaza sang linibo ka mga tumalan-aw sa madinalag-on nga pagpatigayon sang Handog ng Bombo Radyo and Star FM sa Masskara Festival – Dance Showdown Competition kagab-i.
Ang programa ang napuno sang kasadyahan matapos nga madamo sang nagpauli sang papremyo sa ginpatigayon nga mga pahampang para sa mga tumalan-aw.
Nagbisita man sa programa sanday veteran actor kag actress Senator Lito Lapid kag Lorna Tolentino, kun sa diin halos indi man mapunggan sang mga nagabantay sa stage ang pagsaka sang pila ka mga tumalan-aw partikular na sang mismo ang mga celebrities ang nagpanghaboy sang libre nga mga tshirts sa Free Concert-Free T-shirt nga event.
Magluwas sa ila, nagperform man ang pila ka mga local bands kasubong man nagpasadya ang mga casts sang dekada na natun nga paborito nga drama sa radyo, ang Toyang Ermitanya.
Sa pagpa-indis-indis sang 10 ka mga dance groups, nangin mabudlay man para sa mga judges ang pagpili sang mga tagdaog bangod sa ginpakita sang mga ini nga world class performance.
Sa ulihi, nakuha sang United Freestylerz Crew ang ila ika-apat nga kadalag-an sa Handog ng Bombo Radyo and Star FM sa Masskara Festival – Dance Showdown Competition.
Sila ang nagpauli sang P10,000 cash nga premyo.
1st runner up naman ang Danzakin Crew nga nagpauli sang P8,000 kag 2nd runner up ang Gen Alpha nga nakadaog sang P5,000.
Apang magluwas sa ila, tanan ang makabig nga daog bangod nakabaton man sang tag-P2,000 nga consolation prizes ang pito ka iban pa nga team.
Ginapasalamatan naman ni Bombo Mary Divine Grace Moreno Cuello, Station Manager sang Bombo Radyo Bacolod ang tanan nga mga bisita nga nagpuno sa Bacolod City Public Plaza para sa Handog ng Bombo Radyo and Star FM sa Masskara Festival – Dance Showdown Competition.
Ginpasalamatan man sini ang 10 ka mga dance groups nga nagpartisipar kag naghatag sang world class performance, kalakip na ang ila mga pamilya nga nagsuporta.
Kasubong man ang sponsors kaangay sang Payless kag tatlo ka mga nagtindog nga judges.
Pasalig sini nga sa masunod nga tuig, mas madamo pa ang mga prizes kag suprises nga atun malauman sa masunod nga Handog ng Bombo Radyo and Star FM sa Masskara Festival – Dance Showdown Competition.
