Tuman nga kasubo ang nabatyagan sang pamilya Alacre sang ginsugata nila sa Bacolod-Silay International Airport ang pag-abot sang bangkay ni Loreta Alacre, ang Negrense caregiver nga ginpatay sang Hamas militants sa Israel, kaina sang aga.
Kaupod sang pamilya Alacre sa pagsugat si Overseas Workers Welfare Administration Regional Office 6 Director Rizza Joy M. Moldes kag Department of Migrant Workers Regional Office 6 director Glenda Aligonza.
Kaina sang aga, nag-abot sa Ninoy Aquino International Airport ang bangkay ni Loreta Alacre nga ginbiyahe gikan sa Israel antes ginbiyahe liwat padulong sa probinsya sang Negros Occidental.
Wala napunggan sang mga utod ni Lorie ang paghilibion sang nag-abot ang bangkay sang ila utod.
Halin sa Bacolod-Silay International Airport, ginbiyahe padulong sa ciudad sang Cadiz ang bangkay ni Lorie kag gindala sa Funeraria Beniabon sa nasambit nga ciudad. Pag-abot sa punerarya, ginbuksan man ang box nga himo sa plywood nga ginsudlan sang bangkay sang caregiver kag didto ginkumpirmar sang pamilya nga si Lorie ang unod sang box.
Wala nagpahanugot ang pamilya nga makuhaan sang litrato ang sitwasyon sang bangkay ni Lorie agud nga indi na maglapta pa ang litro sini apang personal nga ginlantaw sang Bombo News Team ang bangkay sang Negrense caregiver kag nakita nga mahimo gintunaan sang kamatayon ni Lorie ang igo sang bala sa ulo nga ginkumpirmar man sang personnel sang punerarya nga ang pilas sa ulo sang caregiver ang tuga sang armas-luthang.
Nadesisyunan sang pamilya Alacre nga ibutang sa close casket ang bangkay sang napatay nila nga utod kag pagabutangan lamang sang litrato sang Negrense caregiver sagwa sang lungon sini.
Bwas ginalantaw nga makuha na sang pamilya Alacre ang bangkay sang ila utod nagikan sa punerarya.
Nakabaton sang P200,000 nga financial assistance ang pamilya Alacre nagikan sa OWWA samtang una naman nga nakahatag ang opisina ni House Speaker Martin Romualdez sang P500, 000 nga cash assistance.
