Nagpasalamat ang Bacolod Yuhum Foundation sa tanan nga nagsuporta kag nagsakdag sa bag-o lang natapos nga MassKara Festival.
Sa interview sang Bombo Radyo kay Mate Espina, public relations officer sang Bacolod Yuhum Foundation, madinalag-on ang pagpatigayon sang MassKara Festival subong nga tuig bangud gindagsa ini sang mga pumuluyo kag mga turista.
Nagpasalamat ini sa tanan nga mga Bacolodnon nga nagdala sang mga turista diri sa ciudad agud nga maglantaw sa festival.
Sa pagkamatuod suno sa iya, halos indi na makalakat sa Dalan Lacson sang Domingo sang gab-i bangud sa kadamuon sang tawo.
Makita man suno kay Espina nga mas madamo ang mga nagpadulong sa mga festival sites subong nga tuig kun ipaanggid sang tinalikdan nga tuig.
Ginabanta naman nga nagadangat sa 100,000 ang nagpadulong sa palibot sang Bacolod City Government Center sa sulod lamang sang pila ka adlaw.
Talalupangdon man subong nga tuig nga wala sang dancers nga nalipong halin sa street dance tubtub sa Arena Dance Competition bangud lima lang ka kilo ang maximum nga kabug-aton sang mga head dress, kag nangin maayo man ang lakat sang panahon.
Magluwas diri, wala man sang nagpauli nga luhaan bangud ang wala nagdaog bilang champion tubtub 2nd runner-up ang nakabaton sang P100,000 kada isa.
Gin-athag naman sini nga allowed ang mga barangay nga magkuha sang sponsors agud nga magbulig sa ila sa paggasto sa costume kag props sang mga dancers kun kulang ang ila nga budget.
Ang pahayag ni Espina ang kasunod sang suggestion ni Punong Barangay Noli Villarosa sang Barangay Tangub nga nagdaog bilang 1st runner-up nga sarang gid macluster ang mga numbered barangays agud nga mas magdako ang ila budget kag makatupong ang ila performance sa named barangays.
