Ginmanduan na sang Provincial Environment and Natural Resources (PENRO) ang ila mga personnel sa paghatag sang warning sa mga kandidato nga indi magbutang sang campaign posters sa mga wala na aprubar nga posting area kaangay sang mga kahoy sa campaign period sang Barangay and Sangguniang Kabataan Election 2023.
Sa interview sang Bombo Radyo kay PENRO officer-in-charge Joan Nathaniel Gerangaya, dapat masunod sang mga kandidato ang layi sa pagpanapik sang mga posters agud indi mahalitan ang mga kahoy, pananom, kag mga pampubliko nga mga lugar.
Suno diri, indi pwede nga magbutang ukon maglansang sang mga posters sa mga puno, tanum, park, buluthuan kag publiko nga mga lugar, kun sa diin dapat sundon ang layi nga nagapatuman sang pagpanapik sang posters sa na-assign lamang nga area.
Photo: PENRO NEGROS OCCIDENTAL
Sa idalum sang RA 3571, ang sin-o man nga naghalit ukon nagguba sang nagatubo nga puno ang mahimo nga mapreso sa sulod sang anum ka bulan tubtob duha ka tuig kag magabayad sang tubotb P5,000.
Pahayag ni Gerangaya, sundon ang layi agud indi na magkaproblema pa sa posible nga madisqualify sa pagpapili sa BSKE.
Mensahe ni Gerangaya, dutay na lang gid ang pananum sa ciudad sang Bacolod bangod sa road widening nga ini man kinahanglanon sa problema sang traffic, gani ilisipon na lang ang mga kahoy nga dapat hatagan sang importansya samtang ang eleksyon malabay man lang apang ang kahoy may importante nga papel sa kalibutan.
