Ginsabat sang pinuno sang Bacolod Traffic Authority Office ang alegasyon nga may yara sang nagakatabo nga korapsyon sa sulod sang nasambit nga opisina, kasunod sang pahayag ni City Councilor Al Victor Espino.
Suno kay Police Major Junji Liba, pamangkot sini nga sa pila katuig nga pag-exister sang BTAO kun sadto pa lang may yara na sang alegasyon sang korapsyon, may yara na bala sila sang napasakaan sang kaso?.
Suno kay Liba, halin sa pagpungko sini, gin-athag niya sa mga personnel sang BTAO nga wala siya nagatolerar sa mga nagahimo sang anomalya.
Suno diri, bilang pamatuod may yara na sang tatlo ka mga personnel ang BTAO nga ginterminate sini nga nagahimo sang anomalya kaangay lamang sang isa ka enforcer nga nagpaareglo sa mag-asawa nga nadakpan sini nga naglapas sang traffic rules bangud sa P50.00.
Nagapadayon man ang imbestigasyon sini sa ginapahayag nga isa ka enforcer nga nagbaton sang P1500 gikan sa duha ka mga estudyante nga gindakop sang BTAO bangud wala sang lisensya kag helmet bangud ang nasambit nga issue ang ginhalinan sang nagapadayon nga issue kag kun mapatud-an nga may yara sang ginhimo nga anomalya ang personnel sang BTAO iterminate niya man ini bangud wala siya nagatolerar sang indi maayo nga ginahimo sang mga ini. SAMTANG…Gin-athag sang pinuno sang Bacolod Traffic Authority Office nga nabayaran na sang mga tag-iya sang salakyan kag motorsiklo ang multa sa mga papeles nga ginapirmahan sini agud nga marelease.
Suno kay Police Major Junji Liba, alas-5:30 na sang hapon siya nakapangpirma para sa releasing bangud halin ini sa meeting kay Col. Noel Aliño, Congressman Stephen Paduano kag iban pa nga opisyales sa headquarters sang Bacolod City Police Office kag sa nasambit nga oras natapos gani ginhingagaw gid sini nga mabalikan ang mga papeles nga inugrelease bangud Miyerkules kag Biyernes ang releasing.
Suno kay Liba, antes irelease sang BTAO ang mga gin-impound nga mga salakyan kag motorsiklo, nagapatigayon sila sang seminar agud maintindihan sang mga drivers ang city ordinance nga ginpatuman nila agud indi na mangin issue pa ang multa nga ginbayad sang mga ini.
Nagtalana man ang mga ini sang adlaw sang releasing bangud ginatipon man nila ang mga papeles para matingob ang seminar kag releasing.
Ginpasiguro man sini nga wala sang nagbayad sadtong nga tion bangud alas 3:00 sang hapon nagasirado ang cashier.
Suno diri, siya mismo ang nagapirma sang mga papeles sang mga salakyan kag motorsiklo bangud ginatsekyar sini kun ang pangalan sang ORCR kag sang drivers license ang pareho bangud madamo na sang insidente nga lain ang pangalan sa ORCR kag sa drivers license.
