Nagpasalig ang Israeli Consul to the Philippines nga magabulig ang Israeli government sa pamilya ni Loreta Alacre ang Negrense caregiver nga ginpatay sang Hamas militants sa Israel sang Oktubre 7.
Sa exclusive interview sang Bombo Radyo Bacolod kay Moti Cohen, nakasaad sa layi sang Israel nga kun ano ang mga benepisyo nga makuha sang mga pumuluyo sang Israel sa tion nga mapatay bangud sa hostile action amo man ang makuha nga benepisyo sang mga Overseas Filipino Worker kaangay lamang ni Loreta Alacre.
Suno kay Cohen, pila sa mga benepisyo amo ang pension para sa pamilya ni Lorie, housing kag madamo pa sang iban.
Wala man nakahibalo ang Israeli Consul to the Philippines kun ano kadugay ang pagproseso sang mga papeles para sa nasambit nga benepisyo nga ihatag sang Israeli government apang tinguhaan sang embahada sang Israel sa Pilipinas nga mafacilitate kag mabaton sang pamilya ang benepisyo.
Suno diri, wala pa siya nakapadulong sa iban nga pamilya sang mga Filipino nga nabiktima sa kinagamo nga nagluntad sa tunga sang Israel kag Hamas militants.
Ginpahayag man sini nga safe ang mga nabilin nga Overseas Filipino Workers sa Israel kag indi man ang mga luyag nga magpauli sa Pilipinas bangud hilway man ang mga ini sa nasambit nga pungsod.
