Handa na ang mga traffic enforcers sang Bacolod Traffic Authority Office sa pagdiriher sang dalagan sang trapiko sa nagahilapit nga tigkalalag.
Suno kay BTAO head Police Major Junji Liba, may traffic plan na para sa 13 ka sementeryo sa ciudad sang Bacolod.
Igasirado naman ang portion sang Dalan Burgos bangud sa kadamuon sang mga magabisita sa sementeryo.
Suno kay Liba, 22 ka traffic enforcers ang igadeploy sa bahin sang Burgos Cemetery bangud may yara sang traffic rerouting kun may yara sang road closure.
Ang road closure ang ipatuman alas-6:00 sang aga sa November 1 tubtub alas-6:00 sa gab-i sa Nobyembre 2.
Ang mga salakyan nga padulong sa west ukon sa baybay ang magaliko sa Ylac Street, magaleft turn sa BS Aquino Drive, maleft turn sa Malaspina Street kag magwa sa Lopez Jaena Street, kag maright turn na sa Burgos Street.
Mangin apektado sang road closure ang mga public utility jeepneys nga nagabyahe Homesite, Fortune Towne, Granada, kag Alangilan bangud sarang man makapili sang alagyan ang mga pribado nga salakyan.
Wala naman sang road closure sa iban nga mga patyo bangud magagmay lang ini.
Ang BTAO ang magadeploy sang tag-duha ka traffic enforcers sa kada sementeryo magluwas lang sa Burgos nga butangan sang 22 ka traffic enforcers.
Nagpanugyan naman ini sa mga may salakyan nga ipark ini sang maayo bisan medyo malayo sa sementeryo agud nga indi makatuga sang congestion sang trapiko.
