Nagtaliwan ang isa sa mga nagdaog nga barangay kagawad sang Barangay Zone 14, Talisay City, Negros Occidental bangud sa heart attack.
Ang biktima ang ginkilala nga si Eugenio ‘Toto Amay’ Canada.
Suno sa iya anak nga si Florence Canada, nagboto pa ang iya 65 anyos nga amay kahapon sang aga apang wala na ini nagsaksi sa counting sang mga boto halin kahapon sang hapon bangud nagalain ang iya pamatyag.
Pila ka oras ang nakaligad, gindala ang iya amay sa Corazon Locsin Montelibano Memorial Regional Hospital apang ginbawian ini sang kabuhi alas-4:00 kaina sang kaagahon.
Tuman naman ang kasubo ni Florence bangud wala na nabatian sang iya amay ang balita nga siya ang nagdaog kag indi na niya mapuslan ang iya ginpangabudlayan.
Suno diri, wala gid nila ginalauman ang natabo bangud maayo man ang pamatyag sini antes ang eleksyon.
Suno kay Florence, nagasuffer sang diabetes ang iya amay.
Retired man ini nga empleyado sang city government sang Talisay bilang driver.
Ang biktima ang nangin barangay kagawad sang ila barangay kag nangin three-termer nga punong barangay sang Barangay Zone 14.
