UNITED KINGDOM – Nagapabilin nga normal working days ang Nobyembre 1, All Saint’s Day kag Nobyembre 2, All Souls Day sa United Kingdom.
Sa interview sang Bombo Radyo Bacolod kay Bombo International News Correspondent Ramil Isogon, derekta sa England, United Kingdom sa maragtas sang pungsod naga-angot lamang ang All Saint’s Day kag All Souls Day apang sa England mas ginaselebrar ang All Saint’s Day ukon ang pagpasidungog sa mga martir kag santos.
Ang selebrasyon ang nakafocus naman sa halos tanan nga Christian faith kun sa diin may mga aktibidad sa Christian Schools nga nagalaragway sa kabuhi kag papel sang mga santos kag martir sa maragtas sang kristiyanismo.
Apang indi kaangay sa Pilipinas, wala nagapadulong sa patyo ang mga briton.
Suno kay Isogon, ginalubong sa duta ang mga patay sa UK kag ginabutangan lamang sang krus kag lapida bilang palatandaan.
Dako naman ang bayad sa pagpalubong sa pungsod gani ang iban ang nagapili na lamang sang pagcremate.
Sa pihak nga bahin ang pagsaulog sang All Souls Day ang masami ginaselebrar sang mga kabataan pinaagi sa trick or treat sukok ang ila tagsa ka mga halloween costumes.
Ang mga kabataan sa edad apat tubtob pito ka tuig ang nagapamalay-balay.
Apang may does and dont’s man nga ginatudlo sa mga kabataan kaangay sa likawan ang pagpanuktok sa mga nagapatay sang suga ukon indi kilala bilang pagrespeto sa mga wala nagakilala ukon nagaselebrar sang kahiwatan.
