Naghingyo ang bag-o nga pinuno sang Bacolod Traffic Authority Office (BTAO) sang isa ka semana kag tunga antes ang pagplastar sang ila nga agenda.
Kahapon, naga-umpisa na ang BTAO sa pagplastar sang ila panibag-o nga opisina sa 15th Lacson Street sa ciudad sang Bacolod.
Sa interview sang Bombo Radyo Bacolod kay BTAO Head Patrick Leonard Lacson, nagahingyo ini sang adjustment period ilabi na nga ginasaylo pa nila ang operation sa panibag-o nga location.
Ini bangod kadungan sa pagsaylo, may mga panibag-o man nga magasulod nga mga administrative staffs matapos ang gulpyada nga desisyon ni Bacolod City Mayor Alfredo “Albee” Benitez nga pag-appoint sa iya sa pwesto.
Ang panibag-o nga opisina ang yara karun sa sulod sang BCD Bazket kun sa diin nakalease ang towing company nga na-awardan sang Memorandum of Agreement para sa clamping and towing services sang BTAO.
Ang area ang nagalapad sang 1.7 hectares gani ini ang nagakaigo gid nga lugar bilang impounding area kalakip pa nga sila ang ginhatagan sang airconditioned nga opisina nga human gikan sa container van.
Tuyo man sini nga ma-imprubar ang payment sa bahin sang mga violators kag iban pa pinaagi sa QR Code agud nga deretso na ang kwarta sa City Treasurer’s Office sa Bacolod City Government Center.
Magapahamtang man ang BTAO sang dugang nga mga signages agud magpahibalo sa publiko sa ila panibag-o nga opisina.
Bangod malapad pa ang area sa BCD Bazket, sa karun ginatun-an ni Mayor Benitez ang paghamtang sang one-stop shop sa lugar.
