“Zero corruption” ang nagapanguna nga target mapatuman ni Patrick Leonard Lacson sa pagpungko sini bilang pinuno sang Bacolod Traffic Authority Office (BTAO).
Sa karun padayun ang interview process nga ginapatigayon sa mga empleyado sang BTAO kun sa diin indi lamang administrative employees ang ila nga ginapaidalum sa interview kundi subong man ang tanan nga traffic enforcers.
Sa interview sang Bombo Radyo Bacolod kay Lacson, gin-athag sini nga may parameters kag criteria nga luyag makita si Bacolod City Mayor Alfredo “Albee” Benitez indi lamang sa BTAO kundi sa tanan nga ahensya sang gobyerno.
Ini naman ang mangin basehan kun sin-o ang mapabilin pa sa BTAO matapos ang interview.
Kalakip sa ginalantaw sang mga ini amo ang pagtrabaho, agud matumod kun sin-o ang nagatuman sang ila responsibilidad kag kun sin-o ang masami wala nagatrabaho.
Paathag ni Lacson nga indi pa sini segurado sa karun kun husto na ang numero sang mga traffic enforcers nga yara sa 270 kag kapin 30 nga admin staff.
Suno sa BTAO Head, halos kabisado na sang mga motorista sa Bacolod City kun sa diin nga mga lugar ang may problema sa trapiko, gani pagatun-an pa nila kun ang numero sang personnel ang nagakaigo na bangod mahimo ginakulang lamang sa tawo bangod may iban nga wala nagaperform.
Suno diri, bilang anay consultant sa BTAO, nakita man sini nga ginabuhat man ni former BTAO Head Police Major Junji Liba ang ila mga ginalauman.
Wala naman ini naghatag sang komento sa mga alegasyon nga ginapangatubang sang ginbuslan sini nga BTAO Head apang pahanumdom sini nga humalin sa umpisa, indi luyag ni Benitez sang illegal activities gani iya man tul-idon ang mga loopholes.
Ginaduso naman sini ang pagpasaka sang sweldo sang BTAO personnel sa P15 mil gikan sa P10 mil kada bulan, apang bangod ini ang ginpamatukan sa panindugan nga sobra nga pagpasaka sa sweldo, gani iya ini ginpanaog sa P12 mil.
Sa pihak nga bahin, sa tion nga matumod kun pila ang nagakaigo nga numero sang performing personnel nga makacover na sa mga strategic areas of concern sa trapiko, mahimo man nga panubuan ang numero sang traffic personnels.
