Wala na nakibot ang mga Pinoy sa Houston, Texas sa Estados Unidos sa nangin pamatbat sang korte sa New York nga guilty si former US President Donald Trump sa tanan nga 34 ka charges sang pagfalsify sang business documents agud nga taguon ang ginaalegar affair sini sa porn actor nga si Stormy Daniels antes ang 2016 presidential election.
Sa interview sang Bombo Radyo Bacolod kay Bombo International News Correspondent Noor Moraña, direkta sa Houston, Texas, USA, ginalauman na kag indi big deal sa mga Pilipino sa Texas ang pamatbat kay former US President Donald Trump.
Suno kay Moraña, indi man katapusan sang karera ni Trump sa pulitika ang desisyon sang nasambit nga korte bangud ang matuod nga paghukom amo ang sa Nobyembre 5, 2024.
Suno pa diri, ang desisyon ang kabahin man sang mga political harrassment bangud ginakulbaan na ang administrasyon nga magadaog si Trump sa maabot nga US Presidential elections.
Ginpahayag man ni Morana nga nadismaya man ang mga Republicans sa nangin desisyon sang korte sang New York apang wala na sang makapugong kay former US President Donald Trump nga magpadalagan sa karun nga election.
