Ginpakigbahin ni Bacolod City Mayor Alfredo ‘Albee’ Benitez ang mga programa nga ginpatuman sang iya administrasyon kag nagpasalig ini sang padayon nga pagtrabaho para sa ciudad.
Sa State of the City Address (SOCA) sang alkalde kahapon, July 3, nangin highlight diri amo ang pagpatuman sini sang programa para sa ciudad, kaangay na lamang sang Yuhum Housing, problema sa kuryente kag tubig, burial kag medical assistance kaangay na lamang sang Bacolod City Comprehensive Health Program (BacCHP), infrastructure project kaangay na lamang sang legislative building, kag ginhighlight sini ang first Bacolod Film Festival sang ciudad kag ang pagggamit sang QR code sa pagtsekyar sang legitimate nga mga document.
Suno kay Benitez, indi sini pagpabay-an ang mga programa nga nasuguran samtang nagpangabay man ini sang suporta bangod nga indi man gilayon ma-address ang mga problema sang ciudad apang nagpasalig ini nga iya tumanon ang tanan nga ginpromisa bisan nga amat-amat lamang basta may maayo nga resulta.
Samtang, 8 out of 10 naman ang pag-rate ni Bacolod City Vice Mayor El Cid Familiaran sa State of the City Address sang alkalde.
Suno sa bise alkalde, indi madali nga matuman ang mga programa apang ini man ang may maayo nga resulta.
Dugang pa ni Familiaran, suportado sini ang programa kag proyekto ni Bacolod City Mayor Alfredo ‘Albee’ Benitez.
