Nalakip ang ciudad sang Bacolod sa top 1,000 cities in the world santo sa listahan sang Oxford Economics
Sa interview sang Bombo Radyo Bacolod kay Punong Barangay Caesar Distrito sang Barangay Sincang-Airport kag spokesperson ni Bacolod City Mayor Alfredo ‘Albee’ Benitez, sa siyam ka ciudad sa Pilipinas nga nalakip sa 1,000 cities in the world, yara sa ika-lima nga rank ang Bacolod City.
Samtang, sa isa naman ka libo nga ciudad sa bug-os nga kalibutan, ang Bacolod ang yara sa top 538.
Suno kay Distrito, ang nalakip nga mga ciudad ang ginakonsiderar nga may maayo nga ekonomiya, human capital, quality of life, environment kag governance.
Pahayag ni Distrito, ang ini nga achievement sang ciudad ang nagapakita lamang nga yara sa insakto nga direksyon ang ciudad sa idalum sang administrasyon ni Mayor Benitez.
Sa karun, ginalauman naman ang pagdamo pa gid sang investors sa ciudad nga makabulig sa pagpasanyog sang ekonomiya nga makahatag sang benepisyo sa mga pumuluyo.
Ang siyam ka ciudad sa Pilipinas nga nalakip sa top 1,000 cities in the world, ang ginalakipan sang Manila, Cebu, Cagayan De Oro, Davao City, Zamboanga City, General Santos, Dagupan, kag Angeles City sa Pampanga.
