Nagalaom ang Sports Coordinator sa probinsya sang Negros Occidental nga antes magbiya ang probinsya sa Region 6 kag Western Visayas Regional Athletics Association (WVRAA) makuha ang overall championship sa Palarong Pambansa 2024.
Sa interview sang Bombo Radyo Bacolod kay Romeo Sison, ang Negros Occidental ang nagpadala sang 278 ka mga atleta sa Cebu, kag yara pa ang mga coaches kag trainers.
Suno diri halos sa tanan nga sporting events may ara sang participants kag kalabanan sa mga team sports ang hampangan sang Negros Occidental magluwas lamang sa baseball bangod wala sang may nakadaog sa elementary kag secondary level.
Magluwas sa team events, madamo man sang atleta nga nakasulod para sa individual events.
Suno kay Sison sang Palarong Pambansa 2023 ang Western Visayas ang nagsecond place sunod sa National Capital Region (NCR).
Nagalaom ang mga ini nga sa dedikasyon sang mga atleta kag suporta sang nagkalainlain nga probinsya, mapabilin ang 2nd place sang Western Visayas ukon kun masarangan mangin overall champion.
Suno diri pangabay sang Negros Occidental nga antes magsipak sa Western Visayas kag magsaylo sa Negros Island Region, makabahin ang Negros Occidental sa pagdala sang Western Visayas sa kampeonato.
