Tubtob subong nga gab-i ang ginhatag nga deadline sa mga market vendors sa pagsulod sa bag-o nga Sum-ag Public Market.
Sa interview sang Bombo Radyo Bacolod kay Punong Barangay Rodney Carmona, sang Barangay Sum-ag, Bacolod City, 20 porsyento na ang nakasulod sa merkado kahapon kag ang iban ang ginhatagan sini sang deadline nga magsaylo tubtob sa gab-i.
Ang target gid sini amo ang fish kag vegetable sector nga nagaplastar halos yara na sa dalan.
Paathag sang Punong Barangay nga nagahatag sang dako nga risgo sa mga manugbakal, bangod sila ang yara na sa highway nga mahimo mabungguan sang mga nagalabay nga salakyan.
Apang may mabilin naman nga pito tubtob walo ka stalls sang mga meat vendors nga mapabilin sa pagbaligya sa gwa sang merkado bangod wala pa natapos ang meat section.
Magluwas sa mga ini, ang iban nga mga canopies ang ila naman nga idemolish.
Aminado si Carmona nga apat man ka tuig ang ginhulat antes nabuksan ang bag-o nga merkado.
Ini kuntani ang buksan na sang Disyembre 2023, apang bangod sa problema sa koneksyon sang kuryente, ini ang karun lang natigayon.
Sa pihak nga bahin, ginpahayag man sang engineer nga may-ara pa sang dugang nga kalay-uhon sa merkado kag sila ang nagapangayo pa sang dugang nga P8 million tubtob P10 million nga budget.
