Nakakutkot sang mga high powered firearms kag ammunitions ang militar sa boundary sang ciudad sang San Carlos, kag mga banwa sang Salvador Benedicto kag Calatrava, Negros Occidental.
Sa interview sang Bombo Radyo Bacolod kay Lt. Col. Arnel Calaoagan, Commander sang 79th Infantry Battalion sang Philippine Army, ini kabahin sa Focus Military Operations matapos nga gintudlo sang isa sa mga nagsungka nga miyembro sang nadismantle na nga North Negros Front sang New People’s Army (NPA).
Madumduman nga sang tinalikdan, sunod-sunod nga nagsungka ang apat ka mga rebelde, nga kabahin sa mga naka-engkwentro sang militar sa Barangay Pinapugasan, Escalante City.
Sa bulig sang informant nga residente sang lugar, natultol sang mga militar kun diin nakalubong ang mga war materials nga ginalakipan sang duha ka M14 rifle, isa ka M1 garand rifle, isa ka 12 Guage Shotgun kag nanarisari nga mga ammunitions ukon bala.
Suno kay Calaoagan, ang mga war materials ang ginapatihan nga iya sang mga remnants sang North Negros Front sa Barangay Pinowayan, Salvador Benedicto.
Ini ang pamatuod naman nga amat-amat na nga nagaka-ubos ang miyembro sang mga rebelde, kag nagalaom ang militar nga maneutralize na ang tanan nga remnants.
Suno kay Calaoagan, ang pinakamaayo nga option para sa mga rebelde amo ang magsungka kag mag-avail sang Enhanced Comprehensive Local Integration Program (E-CLIP) kag amnesty program, agud indi na magdangat pa sa pagniluthanganay nga sarang makakuha sang kabuhi gikan sa grupo sang rebelde kag tropa sang militar.
