Nagapabilin nga naka-alerto ang mga kapulisan sa Western Visayas apisar nga natapos nga malinong ang 56th Founding Anniversarry sang Communist Party of the Philippines – New People’s Army (CPP-NPA) kahapon, Disyembre 26.
Sa interview sang Bombo Radyo Bacolod kay Police Regional Office 6 spokesperson Police Lt. Col. Arnel Solis, sa karun naghina na ang pwersa sang mga rebelde kag wala man sila sang mga namonitor nga plano sang mga ini batok sa gobyerno.
Apang padayun ang ila nga pagbantay bangod sa mga tinalikdan nga tinuig, ang mga rebelde ang naghimo sang mga pagpang-atake antes ukon pagkatapos sang ila anibersaryo.
Ginatinguhaan man nila nga mapunggan nga liwat makatipon sang pwersa ang mga rebelde ukon makarecruit sang dugang pa nga mangin biktima sang sala nga ideolohiya partikular na ang mga kabataan.
Suno kay Solis, wala man sang order gikan sa Philippine National Police (PNP) headquarters nga may ceasefire sa tunga sang CPP-NPA subong nga yuletide season.
Gani magapadayun lamang ang ginapatigayon nga mga police operations agud mapapas na ang terrorista nga grupo.
