Nagdangat sa masobra sa 2,600 ka gramos nga suspected shabu kag 11 gramos nga marijuana ang nakumpiskar sang Police Regional Office 6 sa sulod lamang sang 15 ka adlaw sa kampanya batok sa illegal nga druga sa Western Visayas.
Sa interview sang Bombo Radyo Bacolod kay Police Lt. Col. Arnel Solis, spokesperson sang Police Regional Office 6, sa ginpatigayon nga anti-illegal drug operations sang January 1 tubtob 15, nakumpiskar sang Police Regional Office 6 ang 2630 grams sang suspected shabu kag 11 grams sang marijuana kag ginabanta nagabalor sang P17, 800, 000.00 kun sa diin nadakpan ang 196 ka mga suspects.
Suno kay Solis, ini ang natigayon nga makumpiskar sa 157 police operation kun sa diin ang pinakadako nga nakuha amo ang Iloilo Police Provincial Office nga nagdangat sa P5.4 million; ginsundan sang Bacolod City Police Office na may P3.1 million kag Negros Occidental Police Provincial Office (NOCPPO) nga nakakumpiskar sang PHP2.5 million nga balor sang illegal nga druga.
Samtang NOCPPO naman ang may pinakamadamo nga naaresto kun sa diin nagdangat sa 86 ka persona ukon equivalent sa 43.87 percent gikan sa kabug-usan nga numero sang naaresto.
Suno kay Solis, importante sa mga ginapatigayon nga operasyon ang bulig sang mga local government units.
Ini bangud ang mga ginahatag nga impormasyon sang mga ini ang ginagamit sang mga kapulisan para pagpatigayon sang mga buybust operations batok sa mga suspected illegal drug personalities.
Ang mga nadakpan ang magapangatubang sang kaso nga paglapas sa RA 9165 ukon Comprehensive Dangerous Drugs Act of 2002.
