Patay gid ang asawa samtang pilason naman ang bana matapos gin-alegar nga ginbungguan sang puti nga pick-up ang ila ginsakyan nga motorsiklo sa Hacienda Garazon, Brgy. San Jose banwa sang Binalbagan, Negros Occidental sang Sabado sang kaagahon, Pebrero 1, 2025.
Sa interview sang Bombo Radyo Bacolod kay Police Major Jun Ray Batadlan, hepe sang Binalbagan Municipal Police Station, bangud sa impact dead on arrival sa ospital ang asawa samtang ang bana ang kritikal ang kondisyon.
Ginkilala ang mga biktima nga sanday alyas Joear, 44-anyos kag alyas Gilberta, 45-anyos, lunsay mga residente sang Brgy. Quentin Remo banwa sang Moises Padilla.
Suno kay Batadlan, nagasunod sa motorsiklo ang nagbunggo sa mga ini.
Wala man nahibaluan kun sa diin ang pilas sang mga biktima kag kun may suksok ang mga ini nga helmet.
Sa karun padayon pa ang imbestigasyon sang mga kapulisan agud nga matumod ang driver sang pick-up nga gina-alegar naghit and run sa mag-asawa.
